काहीतरी... तुमच्यावरती !

एक तुमच्या असण्यावरती

एक तुमच्या नसण्यावरती

अजून काही लिहायचे आहे

एक तुमच्या हसण्यावरती

शब्दांचा हा खेळ सारा

शब्दांविना खेळायाचा

इतका केला खटाटोप मी केवळ

तुमच्या खुलून दिसण्यावरती

ठेवल्यात मी बांधून खुणा 

तुमच्या मृदु पावलांच्या

उमटल्या आहेत त्या माझ्या

मनाच्या ओल्या मातीवरती

पाखरेही परतली आता घरी

सूर्यही विझला पलीकडे

व्याकूळ नजर भिरभिरते अजूनी

तुम्ही गेल्या त्या वाटेवरती

नादही तुटले अन सूरही सरले

उरले केवळ अश्रू मागे

सोबतीला या श्वासांच्या

जे टिकलेत तुमच्या स्मृतींवरती

प्रखर आहे जाळ मनीचा

लाभेल का मज शीतल-शांती?

जाईन कुठेही जर मिळेल मज 'ती'

इकडे का तिकडे? इथेच का 'वरती'?

एक तुमच्या असण्यावरती

एक तुमच्या नसण्यावरती

अजून काही लिहायचे आहे

एक तुमच्या हसण्यावरती

---

सचिन सोनटक्के